沈珊明上海老底子
夏日吃苦，可以清心作者：杨忠明
沪语改写：周红缨
朗读：沈珊明
指导、推荐：丁迪蒙
点击下方收听音频，时长9分44秒。
苦搭仔甜是相对个，含有某种生物碱苦味道物质个蔬果类食物有蒲公英、苦瓜、芜菁（大头菜）、香莴笋、野蒜（野葱）、枝栀花、菊花、茉莉花、苦荞麦、陈皮、胡柚、百合、棕榈花梗、苦丁茶、芥兰等。中医认为：清热、泻火、通便、燥湿个野菜大多数有苦味道。夏天热得来像火烧一样，人体结聚了湿、热、毒，夏天适当吃一眼含有苦味道个菜对身体有清热解毒个作用。夏天中觉睏好，来一碗冰冻百合绿豆汤，是个勿错个选择。
小辰光，常庄听我外婆讲：“小囡从小要吃眼苦，大了以后再会得有出息。”中国有句老古话：吃得苦中苦，方为人上人。现在个解释是：一个人只有艰苦奋斗，付出辛勤个劳动，再能取得成功。我对于苦味道个食品特别欢喜尝一尝，春天个马兰头、枸杞头、香椿头、芹菜，清炒，冷拌，带一点点苦味道，清口爽喉。现在人工种植个迭眼野菜，缺少了田野风霜雨雪个滋润搭磨练，清苦味道感觉浪向比从前淡仔交关。褐色个苦槠豆腐（苦槠糕）有点象上海人欢喜吃个“麻糊”，是江、浙、闽等地个传统菜肴，防暑降温个佳品。拿果仁浸泡去涩，磨成桨，取淀粉加热调成块状软糕，就是有名个苦槠豆腐，吃口滑爽，味道略微带点苦涩。苦瓜个苦味道最浓，可以冷拌、清炒、煲汤，烹制个窍门是，苦瓜烧得刚刚熟又带点“青色”是最好个。油麦菜又名莜麦菜、生菜，属于菊科，香莴笋类个一种，吃伊个嫩茎嫩叶。
江西有一种大个阔叶青菜估计是变种芥菜，深绿色个叶子老大一瓣，厚厚宽宽个菜梗一年到头可以从外面剥下来，炒来吃，略有苦味。江西人拿柚子皮去脱外层青皮，然后斜刀切薄片，浸了清水里去脱柚子皮个苦涩味道以后做菜，也是废物利用。
唐代怀素传世宝物《苦笋帖》释文：苦笋及茗异常佳，乃可径来。怀素上。帖文个大意是：“苦笋搭仔茗茶两种物事异常佳美，搿就请直接送来伐。怀素敬上。”苦笋是一种头大大个比较粗壮个笋，壳是褐绿色，笋肉是白个，用炒、拌、泡个方法来烧，清口喷香，微微有点苦，回味爽甜(搿种口感搭吃茶老像个)。宋代黄庭坚书《苦笋赋》有，“余酷嗜苦笋，甘脆惬当，小苦而及成味。温润稹密，多啖而不疾人”句。看来古人也欢喜吃苦个呀，夏令季节用苦笋、排骨，加上咸菜烧一只苦笋煲，苦甘可口，味道鲜美，可以消暑。我勒江西新余务农个辰光，深秋，田里向种了交关萝卜秧，碧绿色个叶子油亮亮个，摘下来切碎，加点辣椒勒土灶个大铁锅里猛火一炒，满房间侪是萝卜菜个清香，萝卜菜有一股特别个清苦鲜味，一小碗清炒萝卜菜可以骗两碗红米饭下肚。戊戌春，某日夜里竟然做梦吃到我常常牵记个埃碗萝卜菜。我从网浪买来山泥，寻着几只黑颜色塑料扁箱子放勒窗台外头个铁架子浪，洒了萝卜种子，播种，浇水，4天出苗，几个礼拜以后，一片深绿色肥嫩个萝卜菜长了有廿几公分高，收割，汏清爽，放点辣椒，炒了一尝，嘿，让我寻到了以前萝卜菜个清苦老味道，品尝到自家动手个劳动果实，圆了我个梦想。
来自苏州吴江个慈菇有隐隐约约个苦味道，我拿吃剩下来个十几只慈菇，养勒只装了水个大口扁个玻璃装饰瓶里，初夏，一大把浓绿色勒晨光下头闪烁，一片片箭镞样个慈菇大叶片，为我个书斋增添了池塘野趣。小辰光曾经看过电影《苦菜花》，后来再晓得苦菜又名山苦荬，败酱草。是菊科植物，我曾经勒农家乐尝到过，搿股清凉个苦味道，别具风味，农民讲迭只菜新鲜个辰光呒没啥怪味道，晒干以后有股强烈个脚臭味道。日本人欢喜吃整条头个盐烤秋刀鱼，搭配白饭、味噌汤、萝卜泥一道吃，秋刀鱼个鱼肚肠有苦味道，有些吃客欢喜连鱼肚肠一道吃，伊拉用酱油个咸鲜味，柠檬汁个酸味搭鱼本身个苦味调配出来自大海个风味。上海菜场里冰冻秋刀鱼天天有得卖个，明朝去弄几条，也勿拿脱肚肠，尝尝迭个最原始个苦味道！
（本文作者）（本文朗读者）来源：“吳越小豬”